harbhara tips : हरभरा हे रब्बी हंगामातील शेतकऱ्यांसाठी एक वरदान असलेले पीक आहे. कमी पाण्याची गरज आणि कमी खत मात्रेतही हे पीक चांगले येते. परंतु, केवळ लागवड करून थांबणे पुरेसे नाही; उत्पादन वाढवण्यासाठी आणि दाण्याचा आकार मोठा करण्यासाठी पेरणीनंतरचे व्यवस्थापन अत्यंत महत्त्वाचे आहे.
महात्मा फुले कृषी विद्यापीठातील सहयोगी प्राध्यापक डॉ. नंदकुमार कुटे यांनी हरभरा पिकाच्या एकरी उत्पादनात भरघोस वाढ करण्यासाठी पाण्याचे योग्य नियोजन, आंतरमशागत आणि कीड नियंत्रणाचे प्रभावी उपाय याबद्दल मौल्यवान सल्ला दिला आहे.
हरभरा हे कडधान्यवर्गीय पीक असल्याने, ते आपल्या मुळावरील गाठींद्वारे (Root Nodules) नत्राचे स्थिरीकरण स्वतः करते. त्यामुळे, पेरणीच्या वेळी शिफारशीत मात्रेत खत दिले असल्यास, पेरणीनंतर रासायनिक खते देण्याची फारशी गरज नसते.
